Kezdesýde óńir basshysy batyr anaǵa Tólebı aýdany Lengir qalasynan 4 bólmeli baspananyń kiltin tabys etti. Aıtýly qýanyshymen quttyqtap, júrekjardy tilegin arnady. «Jýyrda ǵana Jazıra qaryndasymyz jastar forýmyna qatysyp, Elbasymyzben kezdesip qaıtty. Oı-pikirin aıtty. Biz sol jıynǵa Jazırany arnaıy jibergen bolatynbyz. Sebebi, kópbalaly ana bolý – úlken mártebe ári qurmet. Bul – adamı resýrs jáne memleketimizdiń basty baılyǵy. Biz kópbalaly otbasylardy jurtshylyqqa úlgi etip, olarǵa qoldaýdy jasaı berýimiz qajet. Búginde tabıǵı ósim boıynsha Túrkistan oblysy respýblıkada kósh bastap tur. Dál qazirgi kezde oblysymyzda 134 myńnan astam kópbalaly ana bar. Onyń 51 myńnan astamy – «Altyn alqa» jáne «Kúmis alqa» ıegerleri. Jas qyz-kelinshekter ózińizdeı batyr analarǵa eliktep ósýi kerek», – degen óńir basshysy jas otbasyǵa 4 bólmeli baspananyń sertıfıkatyn jáne balalarǵa qystyq jyly kıimder tabys etti. Sonymen birge, oblys ákimi Jazıranyń qosymsha mamandyq alý úshin oqýyna jáne jumysqa ornalasýyna qoldaý kórsetiletinin jetkizdi. Otaǵasy Oljas Ábildábekovtiń de jumysqa ornalastyrý máselesi qaralatyn boldy.
Túrkistan oblysy Tóle bı aýdanynyń turǵyny Jazıra Turǵynova 27 jasynda 7 balanyń anasy atanǵan. Búginde 3 qyz, 4 uldy tárbıelep otyrǵan Jazıra elordaǵa páter surap barmaǵan-dy. Saltanatty jıynda jastardy kópbalaly bolýdan qoryqpaýǵa shaqyrdy. Ata-babalarymyzdan mıras bolyp qalǵan osynaý baıtaq elimizde sábılerdiń kóp bolǵanyn qalaıtynyn bildirdi. Ár bala dúnıege óz nesibesimen keletinin eske saldy. Oblys ákimi kiltin tabys etken 4 bólmeli baspana sol ul-qyzdarynyń nesibesi ekeni anyq. Aıta ketelik, batyr anaǵa berilgen baspana ómir súrýge qajetti ınfraqurylymmen jáne jıhazben qamtylǵan.
Ǵalymjan ELShIBAI,
«Egemen Qazaqstan»
Túrkistan oblysy
